Autoridad Portuaria de Vigo
Estado del cielo : Cielo despejado Estado del cielo: Viento de noreste Variación de la temperatura: Bajada de temperaturas 25,0°C
Estación Muelle Trasatlánticos
Noticias de la Autoridad Portuaria

Noticias de la Autoridad Portuaria

09/04/2021
OS PROMOTORES DA PLISAN ACORDAN OFERTAR 250.000 M2 DE SOLO EMPRESARIAL CON PREZOS BONIFICADOS

A Xunta, a Autoridade Portuaria de Vigo e Zona Franca participaron esta mañá na reunión da comisión de seguimento desta área loxística e industrial • Os tres promotores desta área empresarial acordaron esta mañá manter as condicións do concurso de 2019, cando se adxudicou un 20% do solo da Plisan • O Instituto Galego de Vivenda e Solo comprometeuse a iniciar a vindeira semana a redacción dos pregos que permitirán a comercialización das parcelas

OS PROMOTORES DA PLISAN ACORDAN OFERTAR 250.000 M2 DE SOLO EMPRESARIAL CON PREZOS BONIFICADOS

A Xunta de Galicia, a Autoridade Portuaria e Zona Franca acaban de acordar que 250.000 m2 de solo empresarial da Plataforma Loxística Salvaterra-As Neves (Plisan) sairán á venda con prezos bonificados. Así o decidiron os tres promotores desta área loxística e industrial na reunión da comisión de seguimento, convocada pola Xunta e celebrada esta mañá, na que apostaron por manter as condicións do anterior concurso de venda.

A conselleira de Medio Ambiente salientou que o Goberno galego trasladou de xeito insistente a necesidade de manter estes incentivos, para acadar un dobre obxectivo: consolidar a Plisan nunha área empresarial e industrial consolidada e facilitar asentamento de novas industrias, ofrecendo alternativas favorables ás empresas para que poidan instalarse e desenvolver a súa actividade en Galicia, a prezos competitivos e xerando emprego.

Así, tras o acordo, o Instituto Galego de Vivenda e Solo iniciará de xeito inmediato -a vindeira semana- a redacción dos pregos nos que se fixarán as condicións de comercialización deste solo empresarial, ao que se lle aplicará a política de incentivos ás empresas posta en marcha pola Xunta e que permitirá mobilizar en 2021 un total de 8 millóns de euros.

Nesta liña, os tres promotores destacaron a necesidade de favorecer o asentamento de novas empresas na Plisan, sobre todo no contexto de crise sanitaria a nivel mundial. Segundo incidiron, trátase da bolsa de chan industrial máis importante de Galicia e, neste sentido, valoraron o seu carácter estratéxico para poder competir con Portugal.

Concurso de 2019

A conselleira de Medio Ambiente trasladou aos restantes promotores que na actualidade hai demanda de solo e interese por parte das empresas en asentarse nesta área loxística e industrial.

Nese sentido, augurou poder acadar as cifras de adxudicación do anterior concurso, o de 2019, cando se fixo unha poxa pública de máis de 350.000 m2 correspondentes a 45 parcelas, ou o que é o mesmo, se adxudicou un 20% do solo da Plisan, a un prezo competitivo.

Recordou que ese consenso, acordo que hoxe se renova, permitiu vender solo empresarial a un prezo que oscilou entre os 51 euros/m2 e os 70 euros/m2. Reiterou que estas condicións se manterán no vindeiro concurso, polo que a conselleira agradeceu o esforzo dos restantes promotores da Plisan por sumarse ás políticas de incentivos do Goberno galego; sobre todo nun momento como o actual, no que as empresas e os traballadores están a sufrir as consecuencias económicas da covid-19.

Pola súa banda, o delegado do Estado na Zona Franca, David  Regades, subliñou que continúa a aposta pola Plisan ao facer unha nova oferta de chan industrial para o Sur de Galicia. “É moi importante, nun momento de industrialización de Europa, que as administracións sumemos esforzos para poder ofertar ás empresas adoito para xerar emprego”, considerou Regades.

Por último, o presidente da Autoridade Portuaria de Vigo, Jesús Vázquez Almuiña, tamén informou sobre o plan de conexión ferroviaria coa Plataforma e, neste sentido, lembrou que xa se presentou un proxecto construtivo a este respecto a ADIF. Os tres promotores mostraron o seu interese por participar no Proxecto de apoio ao transporte sostible e dixital do Plan de recuperación, transformación e  resiliencia.